ബിജു മേനോന്‍, മേതില്‍ ദേവിക, നിഖില വിമല്‍, അനുശ്രീ എന്നിവരെ പ്രധാന കഥാപാത്രങ്ങളാക്കി വിഷ്ണു മോഹന്‍ സംവിധാനം ചെയ്ത ചിത്രമാണ് കഥ ഇന്നുവരെ. 20-ാം തീയതിയാണ് ചിത്രം തിയറ്ററുകളിലെത്തിയത്. ആദ്യദിനം ലഭിച്ച പോസിറ്റീവ് മൗത്ത് പബ്ലിസിറ്റി തിയറ്ററുകളില്‍ പ്രതിഫലിക്കുന്നുണ്ട്. റിലീസ് ദിനത്തേക്കാള്‍ കൂടുതല്‍ പ്രേക്ഷകര്‍ മൂന്നാം ദിനമായ ഞായറാഴ്ച ചിത്രം കാണാനെത്തി. ചിത്രത്തിന് കുടുംബ പ്രേക്ഷകരുടെ വലിയൊരു സാന്നിധ്യം ഞായറാഴ്ച കേരളമൊട്ടാകെ തിയറ്ററുകളില്‍ ഉണ്ടായി. പത്തിലധികം ഹൗസ് ഫുള്‍ ഷോകള്‍ ഇന്നലെ വൈകുന്നേരം രേഖപ്പെടുത്തി.
വളരെ മികച്ച അഭിപ്രായമാണ് ചിത്രത്തിന് എല്ലായിടത്ത് നിന്നും ലഭിച്ചു കൊണ്ടിരിക്കുന്നതെന്ന് അണിയറക്കാര്‍ പറയുന്നു. ചിത്രത്തിന്റെ ക്ലൈമാക്‌സ് രംഗത്തിന് വലിയ കൈയടിയാണ് ആദ്യ ദിവസം മുതല്‍ തന്നെ ലഭിക്കുന്നത്. വളരെ വ്യത്യസ്തമായ പ്രണയ കഥ പറയുന്ന ചിത്രത്തില്‍ ബിജു മേനോന്റെ ശക്തമായ കഥാപാത്രത്തോടൊപ്പം പ്രശസ്ത നര്‍ത്തകി മേതില്‍ ദേവിക ആദ്യമായി അഭിനയിക്കുന്നു എന്ന പ്രത്യേകതയുമുണ്ട്. നിഖില വിമലിന്റെയും അനുശ്രീയുടെയും കഥാപാത്രങ്ങളും മികച്ച പ്രേക്ഷകാഭിപ്രായമാണ് നേടിയിരിക്കുന്നത്. മേപ്പടിയാന്‍ എന്ന ഹിറ്റ് ചിത്രത്തിന് ശേഷം വിഷ്ണു മോഹന്‍ കഥ എഴുതി സംവിധാനം ചെയ്യുന്ന ചിത്രമാണ് കഥ ഇന്നുവരെ. മലയാളത്തില്‍ ഒരിടവേളയ്ക്കു ശേഷം കുടുംബത്തോടൊപ്പം ആസ്വദിച്ചു കാണാവുന്ന നല്ലൊരു പ്രണയ ചിത്രമാണ് കഥ ഇന്നു വരെയെന്നാണ് പ്രേക്ഷകാഭിപ്രായം.
നിഖില വിമല്‍, ഹക്കീം ഷാജഹാന്‍, അനുശ്രീ, അനു മോഹന്‍, സിദ്ദിഖ്, രണ്‍ജി പണിക്കര്‍, കോട്ടയം രമേശ്, കൃഷ്ണപ്രസാദ്, അപ്പുണ്ണി ശശി, കിഷോര്‍ സത്യ, ജോര്‍ഡി പൂഞ്ഞാര്‍ തുടങ്ങിയ പ്രമുഖരും അഭിനയിക്കുന്നു. വിഷ്ണു മോഹന്‍ സ്റ്റോറീസിന്റെ ബാനറില്‍ വിഷ്ണു മോഹനും, ഒപ്പം ജോമോന്‍ ടി ജോണ്‍, ഷമീര്‍ മുഹമ്മദ്, ഹാരിസ് ദേശം, അനീഷ് പിബി, കൃഷ്ണമൂര്‍ത്തി എന്നിവര്‍ ചേര്‍ന്നാണ് ‘കഥ ഇന്നുവരെ’ നിര്‍മ്മിച്ചിരിക്കുന്നത്. ചിത്രത്തിന്റെ ടീസറും ഗാനവും സോഷ്യല്‍ മീഡിയയില്‍ ഹിറ്റ് ആയിരുന്നു.
ഛായാഗ്രഹണം- ജോമോന്‍ ടി. ജോണ്‍, എഡിറ്റിങ്- ഷമീര്‍ മുഹമ്മദ്, സംഗീതം- അശ്വിന്‍ ആര്യന്‍, പ്രൊഡക്ഷന്‍ കണ്‍ട്രോളര്‍- റിന്നി ദിവാകര്‍, പ്രൊഡക്ഷന്‍ ഡിസൈനര്‍- സുഭാഷ് കരുണ്‍, കോസ്റ്റ്യൂംസ്- ഇര്‍ഷാദ് ചെറുകുന്ന്, മേക്കപ്പ്- സുധി സുരേന്ദ്രന്‍, പ്രൊജക്റ്റ് ഡിസൈനര്‍- വിപിന്‍ കുമാര്‍, വിഎഫ്എക്‌സ്- കോക്കനട്ട് ബഞ്ച്, സൗണ്ട് ഡിസൈന്‍- ടോണി ബാബു, സ്റ്റില്‍സ്- അമല്‍ ജെയിംസ്, പ്രൊമോഷന്‍സ്- ടെന്‍ ജി മീഡിയ, ഡിസൈന്‍സ്- ഇല്യൂമിനാര്‍ട്ടിസ്‌റ്, പിആര്‍ഒ- എ.എസ്. ദിനേശ്, ആതിര ദില്‍ജിത്.
Discussion about this post