ദില്ലി: ഷങ്കര്‍ കമല്‍ഹാസന്‍ സിനിമ ഇന്ത്യന്‍ 2വിന് ബോക്‌സോഫീസില്‍ വന്‍ പരാജയമാണ് നേരിടേണ്ടി വന്നത് ഇപ്പോഴിതാ ഇതിന് പിന്നാലെ ചിത്രം ഇപ്പോള്‍ നിയമ കുരുക്കിലേക്ക് പോവുകയാണ്. ഇന്ത്യന്‍ 2 ഒടിടി റിലീസുമായി ബന്ധപ്പെട്ട് സ്ട്രീമിംഗ് ടൈംലൈന്‍ ലംഘിച്ചുവെന്ന് ആരോപിച്ച് മള്ട്ടിപ്ലക്സ് അസോസിയേഷന്‍ ഓഫ് ഇന്ത്യ സിനിമയുടെ അണിയറക്കാര്‍ക്ക് വക്കീല്‍ നോട്ടീസ് അയച്ചതായി പിങ്ക്വില്ല റിപ്പോര്‍ട്ട് ചെയ്യുന്നു. ചിത്രം ജൂലൈ 12നാണ് റിലീസായത്. തുടര്‍ന്ന് ഒരു മാസം തികയും മുന്‍പേ ഓഗസ്റ്റ് 9 ന് ഒടിടിയിലും എത്തി.
എട്ട് ആഴ്ചയായിരുന്നു ഒടിടി വിന്റോയായി നേരത്തെ കരാറില്‍ എത്തിയിരുന്നത്. ഇത് ഇന്ത്യന്‍ 2 നിര്‍മ്മാതാക്കള്‍ ലംഘിച്ചുവെന്നാണ് മള്ട്ടിപ്ലക്സ് അസോസിയേഷന്‍ ഓഫ് ഇന്ത്യ ആരോപിക്കുന്നത്. ഹിന്ദി സിനിമകള്‍ അവയുടെ തിയേറ്റര്‍ റിലീസുകളും OTT റിലീസുകളും തമ്മില്‍ എട്ട് ആഴ്ചത്തെ ഇടവേള പാലിക്കണമെന്ന് മാര്‍ഗനിര്‍ദേശം നല്‍കിയിട്ടുണ്ട്.
ഈ നിയമം അനുസരിക്കാത്ത നിര്‍മ്മാതാക്കള്‍ക്ക് പിവിആര്‍, സിനിപോളീസ് പോലുള്ള പ്രധാന ദേശീയ മള്ട്ടിപ്ലക്സ് ശൃംഖലകളില്‍ റിലീസ് നഷ്ടപ്പെടും എന്നാണ് വ്യവസ്ഥ. 200 കോടിയോളം ബജറ്റില്‍ കമല്‍ഹാസാന്‍ നായകനായ ഇന്ത്യന്‍ 2 150 കോടിയോളം നേടിയെങ്കിലും ബോക്‌സോഫീസിലും ആരാധകര്‍ക്കും നിരാശയാണ് സമ്മാനിച്ചത്.
കമല്‍ഹാസന്‍ നായകനായി 1996ല്‍ പ്രദര്‍ശനത്തിനെത്തിയ ചിത്രം ‘ഇന്ത്യന്‍ വന്‍ ഹിറ്റായി മാറിയിരുന്നു. ഇന്ത്യന്‍ 2 എത്തിയപ്പോഴും സിനിമയുടെ സംവിധാനം എസ് ഷങ്കറായിരുന്നു. ഛായാഗ്രാഹണം രവി വര്‍മ്മയാണ് നിര്‍വഹിച്ചിരിക്കുന്നത്. നടന്‍ സിദ്ധാര്‍ഥ് ഒരു പ്രധാനപ്പെട്ട കഥാപാത്രമായി എത്തുമ്പോള്‍ എസ് ജെ സൂര്യ, വിവേക്, സാക്കിര്‍ ഹുസൈന്‍, ജയപ്രകാശ്, ജഗന്‍, ഡെല്‍ഹി ഗണേഷ്, സമുദ്രക്കനി, നിഴല്‍ഗള്‍ രവി, ജോര്‍ജ് മര്യന്‍, വിനോദ് സാഗര്‍, ബെനെഡിക്റ്റ് ഗാരെറ്റ്, പ്രിയ ഭവാനി ശങ്കര്‍, രാകുല്‍ പ്രീത് സിംഗ്, ബ്രഹ്‌മാനന്ദന്‍, ബോബി സിന്‍ഹ തുടങ്ങിയവരും അഭിനയിച്ചിട്ടുണ്ട്. അനിരുദ്ധായിരുന്നു ചിത്രത്തിന്റെ സംഗീതം.
Discussion about this post