പൃഥ്വിരാജിനും പ്രിയദര്‍ശനും പിന്നാലെ കായിക രംഗത്ത് നിക്ഷേപം നടത്താനൊരുങ്ങി യുവതാരം ആസിഫ് അലി. സൂപ്പര്‍ ലീഗ് കേരള(എസ്.എല്‍.കെ) ടീമായ കണ്ണൂര്‍ സ്‌ക്വാഡില്‍ ആസിഫ് അലി നിക്ഷേപം നടത്തിയെന്നാണ് റിപ്പോര്‍ട്ട്. ഔദ്യോഗിക പ്രഖ്യാപനം ഉടനുണ്ടാവും.
ഇതിഹാസതാരങ്ങളെ അണിനിരത്തിക്കൊണ്ട് കേരളത്തില്‍ തുടക്കമാകുന്ന പുതിയ ഫുട്ബോള് ലീഗില്‍ നിക്ഷേപവുമായി നേരത്തേ പൃഥ്വിരാജ് എത്തിയിരുന്നു. സൂപ്പര്‍ ലീഗ് കേരള (എസ്എല്‍കെ) ഫുട്ബോള് ക്ലബ്ബായ കൊച്ചി പൈപ്പേഴ്‌സിന്റെ ഓഹരിയാണ് പൃഥ്വിരാജ് വാങ്ങിയിരുന്നത്.
ഇതോടെ കേരളത്തിലെ പ്രൊഫഷണല്‍ ഫുട്ബോള് ടീമിന്റെ സഹ ഉടമയാകുന്ന ആദ്യ സിനിമാ താരമായും പൃഥ്വിരാജ് മാറി. ഫോഴ്സാ കൊച്ചി എഫ്.സി. എന്നാണ് പൃഥ്വിയുടെ ടീമിന്റെ പേര്. ഇതിനുപിന്നാലെയാണ് കേരള ക്രിക്കറ്റ് ലീഗില്‍ സംവിധായകന്‍ പ്രിയദര്‍ശനും നിര്‍മാതാവും വ്യവസായിയുമായ സോഹന്‍ റോയിയും ഫ്രാഞ്ചൈസികള്‍ സ്വന്തമാക്കിയത്. പ്രിയദര്‍ശന്‍ ടീം ഉടമയായതോടെ ലീഗില്‍ ഈ സീസണില്‍ തന്നെ പുതിയ ടീമുകളുടെ സാധ്യത ആരാഞ്ഞ് പലരും വിളിക്കുന്നുണ്ടെന്ന് കെ.സി.എ.പ്രസിഡന്റ് പ്രതികരിച്ചിരുന്നു.
ലീഗിന്റെ ബ്രാന്‍ഡ് അംബാസഡറായി മോഹന്‍ലാല്‍ വന്നതും മൂല്യത്തില്‍ കുതിപ്പുണ്ടാക്കി. രണ്ടരമുതല്‍ മൂന്നരക്കോടി രൂപ വരെയാണ് കേരള ക്രിക്കറ്റ് ലീഗിന്റെ ആദ്യ സീസണില്‍ ടീമിനായി ഓരോ ഫ്രാഞ്ചൈസിയും ചെലവഴിക്കേണ്ടി വരിക.
Discussion about this post