സിബി മലയില്‍ മോഹന്‍ലാല്‍ ചിത്രം ദേവദൂതന്‍ 24 വര്‍ഷത്തിനു ശേഷം വീണ്ടും തിയറ്ററിലേക്ക് എത്തിയിരിക്കുകയാണ്. ചിത്രത്തിന്റെ റീ മാസ്റ്റേഡ് വേര്‍ഷനാണ് ഇന്ന് തിയറ്ററിലേക്ക് എത്തുന്നത്. ഇപ്പോള്‍ സോഷ്യല്‍ മീഡിയയില്‍ വൈറലാവുന്നത് സിബി മലയില്‍ പങ്കുവച്ച ചിത്രമാണ്.
ഞങ്ങള്‍ അന്ന് മെനഞ്ഞെടുത്ത സ്വപ്നചിത്രം ഇന്ന് നിങ്ങള്‍ക്ക് വീണ്ടും തരുകയാണ്. തള്ളാനും കൊള്ളാനും ഉള്ള അവകാശം നിങ്ങള്‍ക്കാണ്. പരാതികളില്ല പരിഭവങ്ങളില്ല സ്‌നേഹം മാത്രം എന്നാണ് സിബി മലയില്‍ കുറിച്ചത്. 24 വര്‍ഷങ്ങള്‍ക്ക് മുന്‍പ് ദേവദൂതന്റെ ഷൂട്ടിങ് ലൊക്കേഷനില്‍ വച്ച് പകര്‍ത്തിയ മോഹന്‍ലാലിനൊപ്പമുള്ള ചിത്രവും അദ്ദേഹം പോസ്റ്റിനൊപ്പം പങ്കുവച്ചു. നിരവധി പേരാണ് പോസ്റ്റിന് താഴെ ആശംസകളുമായി എത്തുന്നത്.
സിബി മലയിലിന്റെ കുറിപ്പ് വായിക്കാം
എന്റെ വായനാ മുറിയിലെ ചുവരില്‍ തൂങ്ങുന്ന ഈ ചിത്രത്തിന് ഇരുപത്തിനാലു വര്‍ഷത്തിന്റെ ചെറുപ്പമുണ്ട് . ദേവദൂതന്റെ ചിത്രീകരണത്തിന്റെ ആദ്യ നാളുകളില്‍ നീലഗിരിയിലെ ഒരു തണുത്ത വെളുപ്പാന്‍ കാലത്ത് പകര്‍ത്തിയ സ്‌നേഹചിത്രം .(പലേരിയെ ഈ കൂട്ടത്തില്‍ കാണാത്തതില്‍ കുണ്ഠിതപ്പെടേണ്ട ,അവന്‍ ‘ആര്‍ക്കോ ആരോടോ പറയാനുള്ള’ വാക്കുകളെ വീണ്ടും വീണ്ടും രാകി മിനുക്കിക്കൊണ്ടു ഹോട്ടല്‍ മുറിയിലുണ്ട് )
കാലം ഞങ്ങള്‍ മൂവരിലും വരുത്തിയ രൂപപരിണാമങ്ങള്‍ ഒട്ടും തന്നെ ബാധിക്കാതെ, ഞങ്ങള്‍ അന്ന് മെനഞ്ഞെടുത്ത സ്വപ്നചിത്രം ഇന്ന് നിങ്ങള്‍ക്ക് വീണ്ടും തരുകയാണ് … തള്ളാനും കൊള്ളാനും ഉള്ള അവകാശം നിങ്ങള്‍ക്കാണ് … പരാതികളില്ല പരിഭവങ്ങളില്ല ,സ്‌നേഹം ,സ്‌നേഹം മാത്രം .
Discussion about this post