സുരേഷ് ഗോപിയെ ആദ്യമായി കണ്ട അനുഭവം പങ്കിടുകയാണ് ആസിഫ് അലി. നേരെ ചൊവ്വെയില്‍ അതിഥിയായി എത്തിയപ്പോഴായിരുന്നു ആസിഫ് അലി ഒരു സിനിമാരംഗം പോലെ തോന്നിച്ച ആ ആദ്യകാഴ്ചയെ കുറിച്ചുള്ള അനുഭവം പങ്കിട്ടത്.
‘സുരേഷ് ഏട്ടനെ ആദ്യം കാണുന്നത് ഇടപ്പള്ളി സിഗ്‌നലില്‍ വച്ചാണ്. ലുലുമാള്‍ വരുന്നതിനു മുന്‍പും ഇടപ്പള്ളി സിഗ്‌നല്‍ ഒരു പേടിസ്വപ്നം ആണ്. അവിടെ റെഡ് ലൈറ്റ് കത്തിയ സമയത്ത് റോഡിലെന്തോ ഒരു തിരക്കു കാണുന്നു. ഞാന്‍ വണ്ടിയില്‍ നിന്നും തലയുയര്‍ത്തി നോക്കിയപ്പോള്‍ കാണുന്നത്, സുരേഷ് ഗോപി ഇടപ്പള്ളി സിഗ്‌നലില്‍ നിന്ന് സിഗ്‌നല്‍ തെറ്റിച്ചുവന്ന ഒരു പ്രൈവറ്റ് ബസ്സുകാരനെ പേടിപ്പിക്കുകയാണ്. അദ്ദേഹം അയാളോട് ഷൗട്ട് ചെയ്യുകയാണ്. സിഗ്‌നല്‍ തെറ്റിച്ച ഡ്രൈവറുടെ വണ്ടിയ്ക്ക് വട്ടം വച്ച് വിറപ്പിക്കുകയാണ്. ഞാനന്ന് സിനിമയില്‍ വന്നിട്ടില്ല,
എനിക്കും വലിയ ചോരത്തിളപ്പുള്ള കാലമാണ്. ഒരു ശങ്കര്‍ സിനിമ കാണുന്ന ഫീലായിരുന്നു അത്. അതൊക്കെ എന്നെ ഒരുപാട് സ്വാധീനിച്ചിട്ടുണ്ട്,’ ആസിഫ് അലി പറഞ്ഞു.
‘ലെവല്‍ ക്രോസ്’ ആണ് ആസിഫിന്റെ ഏറ്റവും പുതിയ ചിത്രം. സംവിധായകന്‍ ജീത്തു ജോസഫ് അവതരിപ്പിക്കുന്ന ഈ ചിത്രം സംവിധാനം ചെയ്തിരിക്കുന്നത് നവാഗതനായ അര്‍ഫാസ് അയൂബാണ്. നടന്‍, സംവിധായകന്‍, തിരക്കഥാകൃത്ത് എന്നീ നിലകളിലൊക്കെ ശ്രദ്ധ നേടിയ ആദം അയൂബിന്റെ മകനാണ് അര്‍ഫാസ്.
ജൂലൈ 26നാണ് ലെവല്‍ ക്രോസ് തിയേറ്ററുകളിലെത്തുക. ഒരു മിസ്റ്ററി ത്രില്ലറാണ് ചിത്രമെന്നാണ് ട്രെയിലര്‍ നല്‍കുന്ന സൂചന. ആസിഫ് അലിയെ കൂടാതെ ഷറഫുദ്ദീന്‍, അമല പോള്‍ എന്നിവരും ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. അഭിഷേക് ഫിലിംസിന്റെ ബാനറില്‍ രമേശ് പിള്ളയാണ് സിനിമ നിര്‍മ്മിക്കുന്നത്. ദുല്‍ഖര്‍ സല്‍മാന്റെ വേഫെയറര്‍ ഫിലിംസ് ആണ് ചിത്രം വിതരണത്തിനെത്തിക്കുന്നത്.
Discussion about this post