‘ഇഷ്‌ക്’ സംവിധായകന്‍ അനുരാജ് മനോഹര്‍ ഒരുക്കുന്ന പുതിയ സിനിമയുടെ ടൈറ്റില്‍ അനൗണ്‍സ്‌മെന്റ് നടന്നു. ‘നരിവേട്ട’ എന്ന് പേരിട്ടിരിക്കുന്ന ചിത്രത്തില്‍ നായകനാകുന്നത് ടോവിനോ തോമസ് ആണ്. സിനിമയുടെ ടൈറ്റില്‍ അനൗണ്‍സ്‌മെന്റിനൊപ്പം മലയാള സിനിമയിലേക്ക് അരങ്ങേറ്റം കുറിയ്ക്കുന്ന ഇന്ത്യന്‍ സിനിമ കമ്പനി എന്ന പ്രൊഡക്ഷന്‍ ഹൗസിന്റെ ലോഞ്ചും നടന്നു. കൊച്ചി ഐഎംഎ ഹാളില്‍ വച്ചു നടന്ന പരിപാടിയില്‍ ടോവിനോയും മറ്റു പ്രധാന താരങ്ങളും പങ്കെടുത്തു.
തമിഴ് സിനിമ നടനും സംവിധായകനുമായ ചേരന്‍ ചിത്രത്തില്‍ പ്രധാന വേഷത്തില്‍ എത്തുന്നുണ്ട്. ചേരന്റെ ആദ്യ മലയാള സിനിമയാണ് നരിവേട്ട. സുരാജ് വെഞ്ഞാറമൂട്, ആര്യ സലിം, റിനി ഉദയകുമാര്‍, പ്രിയംവദ കൃഷ്ണന്‍ എന്നിവരാണ് ചിത്രത്തിലെ മറ്റു താരങ്ങള്‍. ഈ മാസം ഷൂട്ട് ആരംഭിക്കുന്ന ചിത്രം കോട്ടയം, വയനാട് എന്നീ സ്ഥലങ്ങളിലായി ചിത്രീകരണം പൂര്‍ത്തിയാക്കും.
ഇന്ത്യ ജിസിസി ട്രേഡ് അംബാസിഡര്‍ ഷിയാസ് ഹസ്സന്‍, യുഎഇയിലെ ബില്‍ഡിങ് മെറ്റീരിയല്‍ എക്‌സ്‌പോര്‍ട്ട് ബിസിനസ് സംരംഭകന്‍ ടിപ്പു ഷാന്‍ എന്നിവര്‍ ചേര്‍ന്നാണ് ഇന്ത്യന്‍ സിനിമ കമ്പനി രൂപീകരിച്ചിരിക്കുന്നത്.മലയാള സിനിമ പ്രേമികള്‍ക്ക് പുതുമയാര്‍ന്ന അനുഭവങ്ങള്‍ സമ്മാനിക്കുക എന്നതുമാണ് കമ്പനിയുടെ ലക്ഷ്യമെന്ന് ചടങ്ങില്‍ നിര്‍മ്മാതാക്കള്‍ പറഞ്ഞു. ഫഹദ് ഫാസില്‍- എസ് ജെ സൂര്യ- വിപിന്‍ ദാസ് ചിത്രമാണ് ഇന്ത്യന്‍ സിനിമ കമ്പനിയുടെ അടുത്ത നിര്‍മ്മാണ സംരംഭം.
Discussion about this post