അക്ഷയ് കുമാര്‍ നായകനാകുന്ന സിനിമകള്‍ അടിക്കടി പരാജയം ഏറ്റുവാങ്ങുകയാണ്. ആ പട്ടികയില്‍ ഏറ്റവും പുതിയത് സര്‍ഫിറ തന്നെ. വലിയ പരാജയത്തിലേക്കാണ് സിനിമ കൂപ്പുകുത്തുന്നത്. ആരാധകര്‍ വരെ താരത്തെ വിമര്‍ശിക്കുകയാണ്. ഈ സാഹചര്യത്തില്‍ ദുല്‍ഖര്‍ സല്‍മാന്‍ ചിത്രത്തെ പുകഴ്ത്തി രംഗത്ത് എത്തിയിരിക്കുകയാണ്. എക്‌സില്‍ ഇട്ട പോസ്റ്റിലാണ് ചിത്രത്തിന്റെ മുഴുവന്‍ അണിയറക്കാരെയും അഭിനന്ദിച്ച് ദുല്‍ഖര്‍ ഒരു കുറിപ്പ് പങ്കുവച്ചത്.
സംവിധായികയെ പ്രശംസിച്ചുകൊണ്ടാണ് ദുല്‍ഖര്‍ കുറിപ്പ് ആരംഭിച്ചത്. ‘ഒരു ക്ലാസിക് മറ്റൊരു ഭാഷയിലേക്ക് പുനര്‍നിര്‍മ്മിക്കുന്നത് എല്ലായ്‌പ്പോഴും വളരെ ബുദ്ധിമുട്ടാണ് പക്ഷേ സുധ കൊങ്കര അത് അനായാസമായി ചെയ്തിരിക്കുന്നു. അത് ആധികാരികമാണ്’ എന്ന് ദുല്‍ഖര്‍ എഴുതി. അഭിനേതാക്കളായ അക്ഷയ്കുമാര്‍ സാര്‍, രാധികമാദന്‍, സിമാബിശ്വാസ്, പരേഷ് റാവല്‍, ശരത് കുമാര്‍ എന്നിവരെയും ദുല്‍ഖര്‍ അഭിനന്ദിച്ചു.
ചിത്രത്തിന്റെ നിര്‍മ്മാണ പങ്കാളികളായ തമിഴ് താരം സൂര്യയെയും ജ്യോതികയെയും ദുല്‍ഖര്‍ കുറിപ്പില്‍ അഭിനന്ദിക്കുന്നുണ്ട്. സൂരറൈ പോട്ര് എന്ന തമിഴ് ചിത്രത്തിന്റെ ഹിന്ദി റീമേക്കാണ് സര്‍ഫിറ. തമിഴ് ചിത്രത്തിന്റെ സംവിധായിക സുധ കൊങ്കര തന്നെയാണ് ഇതും സംവിധാനം ചെയ്തിരിക്കുന്നത്.
ഇന്‍ഡസ്ട്രി ട്രാക്കര്‍ സാക്‌നില്‍ക്കിന്റെ കണക്കുകള്‍ പ്രകാരം, സര്‍ഫിറ ഏഴ് ദിവസത്തെ ബോക്സ് ഓഫീസ് കളക്ഷന്‍ 1.25 കോടി രൂപ മാത്രമാണ്. ഏഴ് ദിവസം പിന്നിടുമ്പോള്‍ ചിത്രത്തിന്റെ ആകെ കളക്ഷന്‍ 18 കോടി രൂപ മാത്രമാണ്. 80 കോടിയിലേറെയാണ് ചിത്രത്തിന്റെ ബജറ്റ്.
Discussion about this post