ഇന്ത്യന്‍ 2 ഇന്നലെ മുതല്‍ പ്രദര്‍ശനം തുടങ്ങിയിരിക്കുകയാണ്്. 28 വര്‍ഷങ്ങള്‍ക്കിപ്പുറം ശങ്കറും കമല്‍ഹാസനും വീണ്ടും ഒന്നിച്ച ചിത്രം സമ്മിശ്ര പ്രതികരണം നേടുമ്പോള്‍ സിനിമയ്ക്കായി ശങ്കറും കമലും ഉള്‍പ്പടെയുള്ള താരങ്ങള്‍ കൈപ്പറ്റിയ പ്രതിഫലത്തെക്കുറിച്ചുള്ള റിപ്പോര്‍ട്ടുകളാണ് ചര്‍ച്ചയാകുന്നത്. ഇന്ത്യന്‍ തുടര്‍ച്ചയ്ക്ക് വേണ്ടി കമല്‍ഹാസന്‍ 150 കോടി രൂപ പ്രതിഫലം വാങ്ങിയതായാണ് ന്യൂസ് 18 റിപ്പോര്‍ട്ട്. എന്നാല്‍ ഇത് ഇന്ത്യന്‍ 2, ഇന്ത്യന്‍ 3 എന്നീ രണ്ട് സിനിമകള്‍ക്കും ചേര്‍ത്താണെന്നും റിപ്പോര്‍ട്ടുകളുണ്ട്. തന്റെ മുന്‍സിനിമയായ കല്‍ക്കി 2898 എഡിയില്‍ കമലിന്റെ പ്രതിഫലം 20 കോടിയായിരുന്നു.
സംവിധായകന്‍ ശങ്കര്‍ കൈപറ്റിയിരിക്കുന്നത് 50 കോടി രൂപയാണെന്നാണ് സൂചന. മുന്‍ചിത്രമായ 2.0യ്ക്കായി 40 കോടിയായിരുന്നു ശങ്കര്‍ വാങ്ങിയത്. തന്റെ കഥാപാത്രത്തിനായി നടന്‍ സിദ്ധാര്‍ഥ് നാല് കോടിയാണ് വാങ്ങിയിരിക്കുന്നത്. ഇന്ത്യന്‍ 2ല്‍ നായകതുല്യമായ കഥാപാത്രത്തെയാണ് അദ്ദേഹം അവതരിപ്പിച്ചിരിക്കുന്നത്. രണ്ട് കോടി രൂപയാണ് നടി രാകുല്‍ പ്രീത് സിങ്ങിന്റെ പ്രതിഫലം .
1996-ലെ ബോക്സ് ഓഫീസ് റെക്കോര്‍ഡുകള്‍ തകര്‍ത്ത ‘ഇന്ത്യന്‍’ ചിത്രത്തിന്റെ രണ്ടാം ഭാഗമാണ് ഇന്ത്യന്‍ 2. ലൈക്ക പ്രൊഡക്ഷന്‍സ്, റെഡ് ജയിന്റ് മൂവീസ് എന്നിവര്‍ ചേര്‍ന്നു നിര്‍മിച്ചിരിക്കുന്ന ചിത്രത്തില്‍ എസ് ജെ സൂര്യ, വിവേക്, സാക്കിര്‍ ഹുസൈന്‍, ജയപ്രകാശ്, ജഗന്‍, ഡല്‍ഹി ഗണേഷ്, സമുദ്രക്കനി, നിഴല്‍ഗള്‍ രവി, ജോര്‍ജ് മര്യന്‍, വിനോദ് സാഗര്‍, ബെനഡിക്റ്റ് ഗാരെറ്റ്, പ്രിയ ഭവാനി ശങ്കര്‍, രാകുല്‍ പ്രീത് സിംഗ്, ബ്രഹ്‌മാനന്ദം, ബോബി സിംഹ തുടങ്ങി വലിയൊരു താരനിര തന്നെയാണ് ഭാഗമായിരിക്കുന്നത്.
ആദ്യദിനം പിന്നിടുമ്പോള്‍ സിനിമ ഇന്ത്യന്‍ ബോക്സ് ഓഫീസില്‍ നിന്ന് 26 കോടി രൂപയാണ് നേടിയത്. ഇന്ത്യന്‍ രണ്ടാം ഭാഗത്തിന്റെ തമിഴ് പതിപ്പ് 17 കോടി രൂപയാണ് നേടിയത്. തെലുങ്ക് പതിപ്പ് 7.9 കോടി നേടിയപ്പോള്‍ 1.1 കോടിയാണ് ഹിന്ദി പതിപ്പില്‍ നിന്ന് ലഭിച്ചത്. കമല്‍ഹാസന്റെ മുന്‍ചിത്രമായ വിക്രമിനെ അപേക്ഷിച്ച് കുറവ് തുക മാത്രമാണ് ആദ്യദിനത്തില്‍ ഇന്ത്യന്‍ 2-വിന് നേടാനായത്.
Discussion about this post