ദിലീപ് വിഷയത്തില്‍ സ്വന്തം അഭിപ്രായം പറഞ്ഞുവെന്നുള്ള ഒറ്റക്കാരണത്താല്‍ ദിലീപ് അനുകൂലിയാക്കി സിനിമയില്‍ നിന്ന് ഒതുക്കാന്‍ ചിലര്‍ ശ്രമിച്ചുവെന്ന് നടി ലക്ഷ്മി പ്രിയ. വിഷയത്തിലേക്ക് അമ്മ സംഘടനയെ വലിച്ചിഴച്ചെന്നും അതു മൂലം അമ്മ നിന്നു പോകുമെന്ന ആധിയായിരുന്നു തനിക്കെന്നും അവര്‍ ഒരു ഓണ്‍ലൈന്‍ മാധ്യമവുമായുള്ള അഭിമുഖത്തില്‍ പറഞ്ഞു.
‘ഈയൊരു പ്രശ്‌നം കൊണ്ട് എന്റെ സംഘടനയായ അമ്മ നിന്നു പോകുമോ എന്ന ആദിയായിരുന്നു എനിക്ക്. ഞാന്‍ മാത്രമാണ് ഈ പ്രശ്‌നങ്ങളിലൊക്കെ പ്രതികരിച്ചത്. അന്നുമുതലാണ് എന്റെ അവസരങ്ങളെല്ലാം പോയത്. സത്യം പറഞ്ഞാല്‍ ദിലീപേട്ടന്റെ വിഷയത്തില്‍ ഞാന്‍ പരസ്യമായി സംസാരിച്ചതാണ് ഈ ഒതുക്കി നിര്‍ത്തലെന്നോ, മാറ്റിനിര്‍ത്തലെന്നോ പറയുന്ന അവസ്ഥയ്ക്ക് കാരണം. തെറ്റ് ചെയ്തിട്ടുണ്ടെങ്കില്‍ അദ്ദേഹം ശിക്ഷ അനുഭവിക്കട്ടെ. നമ്മള്‍ ആരാണ് അദ്ദേഹത്തെ വിചാരണ ചെയ്യാന്‍. അതിന്റെ പേരില്‍ അമ്മ എന്ന സംഘടനയ്ക്ക് നേരെ പറയരുത് എന്നാണ് ഞാന്‍ അന്ന് പറഞ്ഞത്”.
‘ഞാനൊരിക്കലും ദിലീപേട്ടനെ ന്യായീകരിച്ചിട്ടില്ല. പക്ഷേ അദ്ദേഹം നിഷ്‌കളങ്കനാണ് എന്നതാണ് എന്റെ വിശ്വാസം. അദ്ദേഹത്തെപ്പോലൊരാള്‍ അങ്ങനെ ചെയ്യില്ല എന്നതാണ് ഞാന്‍ വിശ്വസിക്കുന്നത്. അങ്ങനെ വിശ്വസിക്കുന്ന ഒരുപാട് പേരുണ്ട്, അതില്‍ ഒരാളാണ് ഞാന്‍. നമുക്കറിയാവുന്ന ഒരു ദിലീപേട്ടന്‍ ഉണ്ട്. ആ ദിലീപേട്ടന്‍ അങ്ങനെ ചെയ്യില്ല.
അദ്ദേഹം ആ തെറ്റ് ചെയ്തിട്ടുണ്ടെങ്കില്‍ അദ്ദേഹം അനുഭവിക്കട്ടെ. ആ സമയത്തെ എന്റെ പ്രതികരണങ്ങളൊന്നും അമ്മയ്ക്ക് വേണ്ടി സംസാരിച്ചതായിട്ടല്ല ആടിനെ പട്ടിയാക്കുന്ന മാധ്യമങ്ങള്‍ നല്‍കിയത്. എന്റെ വാക്കുകളെ ദിലീപ് അനുകൂലി എന്ന രീതിയിലാണ് കൊണ്ടുപോയത്”-ലക്ഷ്മി പ്രിയ കൂട്ടിച്ചേര്‍ത്തു.
Discussion about this post