നാല് സിനിമകളില്‍ അഭിനയിച്ച തനിക്ക് അംഗത്വം തരാന്‍ താരസംഘടന അമ്മ സംഘടന തയ്യാറാകുന്നില്ലെന്ന് അനശ്വര നടന്‍ സത്യന്റെ മകന്റെ വെളിപ്പെടുത്തല്‍. ജനറല്‍ സെക്രട്ടറിയായിരുന്ന ഇടവേള ബാബുവിന് മെമ്പര്‍ഷിപ്പിനുള്ള അപേക്ഷ വര്‍ഷങ്ങള്‍ക്ക് മുമ്പ് ഇമെയില്‍ ചെയ്തിരുന്നെങ്കിലും അതിന് മറുപടി തരാന്‍ പോലും അവര്‍ തയ്യാറായില്ലെന്നും സതീഷ് സത്യന്‍ കുറ്റപ്പെടുത്തി. നാല് സിനിമയില്‍ അ?ഭിനയിച്ച സതീഷ് സത്യന്‍ കണ്ണിന് കാഴ്ച നഷ്ടമായതിന് പിന്നാലെയാണ് പിന്നീട് അഭിനയരംഗത്ത് നിന്ന് പിന്മാറിയത്.
‘ മലയാള സിനിമ കുടുംബത്തിലെ അംഗമാകണമെന്നേ ആഗ്രഹമുണ്ടായിരുന്നുള്ളൂ. അതുകൊണ്ടാണ് അമ്മയില്‍ മെമ്പര്‍ഷിപ്പിന് അപേക്ഷിച്ചത്. ഇടവേള ബാബുവാണ് മെയില്‍ അയക്കാന്‍ പറഞ്ഞത്. കൈനീട്ടമോ മറ്റ് സാമ്പത്തിക സഹായമോ ഒരിക്കലും ആവശ്യമില്ലെന്ന് മെയിലില്‍ സൂചിപ്പിക്കുകയും ചെയ്തു. പിന്നിട് ഇടവേള ബാബുവിനോട് ഇതിനെ കുറിച്ച് അന്വേഷിക്കുമ്പോള്‍ ഒഴിവാക്കുന്ന തരത്തിലാണ് സംസാരിച്ചത്. ചേട്ടന് ഇപ്പോള്‍ നടനല്ലല്ലോ, അതുകൊണ്ട് അത് നടക്കില്ല.
ചേട്ടന് മെമ്പര്‍ഷിപ്പ് തന്നാല്‍ ഒരുപാട് പേര് ഇതുംപറഞ്ഞ് അപേക്ഷ തരും, അത് ഞങ്ങള്‍ക്ക് ബുദ്ധിമുട്ടാകുമെന്നും ബാബു പറഞ്ഞു”.
‘ഇന്ന് ഈ സംഘടനയിലുള്ള പല ആളുകള്‍ക്കും അവര്‍ അഭിനയം നിര്‍ത്തിയതിന് ശേഷമാണ് അംഗത്വം നല്‍കിയിരിക്കുന്നത്. അവരുടെ പേര് എന്നക്കൊണ്ട് പറയിക്കരുത്. ഞാന്‍ സിനിമയില്‍ പശുവിനെ അഴിച്ച് കെട്ടുന്ന രംഗമല്ല ചെയ്തത്. നായകനായാണ് അഭിനയിച്ചത്. സത്യനെന്ന മഹാനടന്റെ മകന് ആയതു കൊണ്ടും സത്യന്റെ മലയാള സിനിമയക്കുള്ള സംഭാവനകള്‍ പരിഗണിച്ചും ഓണററി മെമ്പര്‍ഷിപ്പെങ്കിലും നല്‍കണമായിരുന്നു.
ഞാന്‍ കൊടുത്ത അപേക്ഷ മോഹന്‍ലാലും മമ്മൂട്ടിയും അറിഞ്ഞുകാണും. ആദ്യമായാണ് ഇത് പൊതുമദ്ധ്യത്തില്‍ പറയുന്നത്. പുതിയ ഭാരവാഹികളെങ്കിലും ഇതിന് വ്യക്തമായ കാരണസഹിതം ഒരു മറുപടി നല്‍കണമെന്നും” സതീഷ് സത്യന്‍ ആവശ്യമുന്നയിച്ചു.
Discussion about this post