ഒരാഴ്ച്ചയ്ക്ക് ശേഷം ഇന്ത്യന്‍ 2′ റിലീസിനായി തീയേറ്ററുകളിലെത്തുകയാണ്. 28 വര്‍ഷം മുന്‍പ് തമിഴ് പ്രേക്ഷകര്‍ക്ക് ആവേശമായ ചിത്രത്തിന്റെ രണ്ടാം ഭാഗമെത്തുമ്പോള്‍ പ്രതീക്ഷകളേറെയാണ്. പുതിയ റിപ്പോര്‍ട്ടുകള്‍ പ്രകാരം ചിത്രത്തിന് U/A സര്‍ട്ടിഫിക്കേറ്റാണ് സെന്‍സര്‍ ബോര്‍ഡ് നല്‍കിയിരിക്കുന്നത്. സിനിമയില്‍ അഞ്ച് പ്രധാന മാറ്റങ്ങള്‍ വരുത്തിക്കൊണ്ടാണ് U/A സര്‍ട്ടിഫിക്കേഷന്‍ നല്‍കിയിരിക്കുന്നത്.
അതിലൊന്ന് പുകവലി മുന്നറിയിപ്പിന്റെ വലുപ്പം കൂട്ടുക എന്നതാണ്. വാചകം വെളുത്ത പശ്ചാത്തലത്തില്‍ കറുത്ത അക്ഷരത്തില്‍ ബോള്‍ഡ് ആക്കണമെന്നും നിര്‍ദ്ദേശമുണ്ട്. രണ്ടാമതായി, ‘കൈക്കൂലി ചന്ത’ എന്ന പ്രയോഗം സിനിമയില്‍ നീക്കം ചെയ്യണം.’ഡേര്‍ട്ടി ഇന്ത്യന്‍’ പോലുള്ള വാക്കുകളും അശ്ലീല വാചകങ്ങളും ചില രംഗങ്ങളില്‍ നിന്ന് നീക്കം ചെയ്യാനും പകര്‍പ്പവകാശമുള്ള ഉള്ളടക്കം ഉപയോഗിക്കുന്നതിന് എന്‍ഒസി നല്‍കണമെന്നും സിനിമാ പ്രവര്‍ത്തകര്‍ക്ക് നിര്‍ദ്ദേശം നല്‍കിയിട്ടുണ്ട്.
മൂന്ന് മണിക്കൂര്‍ നാല് സെക്കന്‍ഡാണ് സിനിമയുടെ ദൈര്‍ഘ്യം. ജൂലൈ 12-നാണ് ചിത്രം റിലീസിനെത്തുന്നത്. ചിത്രത്തിനായി 150 കോടിയാണ് കമല്‍ഹാസന് നല്‍കിയ പ്രതിഫലം എന്നാണ് റിപ്പോര്‍ട്ട്. ഇന്ത്യന്‍-2ല്‍ രകുല്‍ പ്രീത്, പ്രിയ ഭവാനി ശങ്കര്‍, സിദ്ധാര്‍ഥ്, ജേസണ്‍ ലംബേര്‍ട്ട്, ഗുല്‍ഷന്‍ ഗ്രോവര്‍, ബോബി സിംഹ, എസ് ജെ സൂര്യ തുടങ്ങിയവരും പ്രധാന കഥാപാത്രങ്ങളാകുന്നുണ്ട്. അന്തരിച്ച് നടന്മാരായ നെടുമുടി വേണു, വിവേക് എന്നിവരുടെ കഥാപാത്രങ്ങള്‍ വീണ്ടും സിജിഐ ടെക്‌നോളജി ഉപയോഗിച്ചും ബോഡി ഡബിളിംഗിലൂടെയും സ്‌ക്രീനിലെത്തുന്നുണ്ട്.
അനിരുദ്ധ് രവിചന്ദറാണ് സംഗീത സംവിധാനം നിര്‍വഹിച്ചിരിക്കുന്നത്. ചിത്രത്തിലെ ഗാനങ്ങളെല്ലാം ഇതിനോടകം തന്നെ ശ്രദ്ധ നേടി കഴിഞ്ഞു. ഇന്ത്യന്‍ 2വിനൊപ്പം ഇന്ത്യന്‍ 3യും ഒരുമിച്ചാണ് ചിത്രീകരിച്ചത്. രണ്ടാം ഭാഗത്തിന്റെ റിലീസിന് ശേഷം മൂന്നാം ഭാഗവും വൈകാതെ തിയേറ്ററുകളിലെത്തുമെന്നും സംവിധായകന്‍ ശങ്കര്‍ പറഞ്ഞിരുന്നു.
Discussion about this post