സിനിമയില്‍ താരങ്ങള്‍ പ്രതിഫലം കുത്തനെ ഉയര്‍ത്തിയതോടെ പ്രതിസന്ധിയിലായി നിര്‍മ്മാതാക്കള്‍. പ്രമുഖ താരങ്ങളും യുവതാരങ്ങളും കൂടാതെ സാങ്കേതിക വിദഗ്ധരും പ്രതിഫലം ഉയര്‍ത്തിയിരിക്കുകയാണ്. അതിനാല്‍ പ്രതിഫലം കുറയ്ക്കണമെന്നാവശ്യപ്പെട്ട് താര സംഘടനയായ ‘അമ്മ’യ്ക്ക് കത്തുനല്‍കിയിരിക്കുകയാണ് ഇപ്പോള്‍് പ്രൊഡ്യൂസേഴ്സ് അസോസിയേഷന്‍.
താങ്ങാനാകാത്ത പ്രതിഫലം ചോദിക്കുന്നതു കാരണം ചില നിര്‍മ്മാതാക്കള്‍ക്ക് സിനിമകള്‍ പോലും ഉപേക്ഷിക്കേണ്ട സാഹചര്യത്തിലേക്ക് കടക്കുകയാണ്. നാല് കോടിക്ക് മുകളിലാണ് പ്രമുഖ താരങ്ങളടക്കം പ്രതിഫലം. നാല് കോടിക്ക് മുകളിലാണ് എല്ലാ മുന്‍നിര താരങ്ങളുടെയും പ്രതിഫലം. ഒരു മലയാള സിനിമയില്‍ അഭിനയിക്കാന്‍ ഒരു ് യുവതാരം ആവശ്യപ്പെട്ടത് അഞ്ച് കോടി രൂപയാണ്.
ഇതോടെ സിനിമയുടെ മുഴുവന്‍ പ്രതിഫലം 15 കോടിയിലധികമാകും. വലിയ തുകയ്ക്ക് സിനിമ വാങ്ങുന്നത് ഒടിടി പ്ലാറ്റ്ഫോമുകള്‍ നിര്‍ത്തിയതോടെ തിയേറ്ററില്‍ നിന്നുമാത്രം ലഭിക്കുന്ന തുക ലാഭമുണ്ടാക്കുന്ന കാര്യത്തിലും സംശയമാണ്. കൗമാര താരം പോലും ആവശ്യപ്പെടുന്നത് ഒന്നരക്കോടി രൂപയാണെന്നും ഛായാഗ്രാഹകരില്‍ ചിലര്‍ ദിവസവേതനത്തിനാണ് വരാന്‍ തയാറാകുന്നതെന്നും നിര്‍മ്മാതാക്കള്‍ ആശങ്ക പ്രകടിപ്പിക്കുന്നു.
ശ്രദ്ധേയരായ സംഗീത സംവിധായകര്‍ പ്രതിഫലത്തിന് പകരം സിനിമയിലെ ഗാനങ്ങളുടെ പകര്‍പ്പവകാശമാണ് വാങ്ങുന്നത്. തുടര്‍ന്ന് ഇവര്‍ വമ്പന്‍ തുകയ്ക്ക് മ്യൂസിക് കമ്പനികള്‍ക്ക് വില്‍ക്കുകയും ചെയ്യുന്നുണ്ട്. അതുകൊണ്ട് തന്നെ തിയേറ്ററില്‍ നിന്ന ലഭിക്കുന്ന വരുമാനം മാത്രം എന്ന നിലയിലേക്ക് എത്തിയിരിക്കുകയാണ് നിര്‍മ്മാതാക്കള്‍.
‘അമ്മ’യുടെ പുതിയ ഭാരവാഹികളുടെ ആദ്യ യോഗത്തില്‍ നിര്‍മ്മാതാക്കളുടെ പ്രശ്‌നം ചര്‍ച്ചയാകുമെന്നാണ് പ്രതീക്ഷ. സാങ്കേതിക വിദഗ്ധരുടെ പ്രതിഫലത്തെക്കുറിച്ച് ഫെഫ്കയെ അറിയിക്കാനും തീരുമാനമായിട്ടുണ്ട്. ഇതേ പ്രശ്‌നം നേരിട്ട തമിഴ് സിനിമ നിര്‍മ്മാതാക്കള്‍ സിനിമകള്‍ ചിത്രീകരിക്കേണ്ടെന്ന തീരുമാനത്തിലെത്തുകയായിരുന്നു.
Discussion about this post