ടൊവിനോ തോമസിന്റെ നിര്‍മാണത്തില്‍ ബേസില്‍ നായകനായി നവാഗതനായ ശിവപ്രസാദ് സംവിധാനം ചെയ്യുന്ന പുതിയ ചിത്രം ‘മരണമാസ്സിന്റെ ‘ ചിത്രീകരണം ആരംഭിച്ചു. ബേസില്‍ ജോസഫാണ് ചിത്രത്തിലെ നായക കഥാപാത്രത്തെ അവതരിപ്പിക്കുന്നത്. ഒരു കോമഡി എന്റര്‍ടെയിനറാണ് ചിത്രം എന്നാണ് സൂചന.
ടൊവിനോ തോമസ് പ്രൊഡക്ഷന്‍സും വേള്‍ഡ് വൈഡ് ഫിലിംസും ചേര്‍ന്നാണ് ചിത്രം നിര്‍മിക്കുന്നത്. ടൊവിനോ തോമസ്, ടിങ്സ്റ്റന്‍ തോമസ്, തന്‍സീര്‍ സലാം, റാഫേല്‍ പോഴോളിപറമ്പില്‍ എന്നിവരാണ് മരണമാസ്സിന്റെ നിര്‍മാതാക്കള്‍. ചിത്രത്തിന്റെ എക്‌സിക്യൂട്ടീവ് പ്രൊഡ്യൂസര്‍ ഗോകുല്‍നാഥാണ്. ചിത്രത്തിന്റെ പൂജയും സ്വിച്ച് ഓണും കൊച്ചി അഞ്ചുമന ക്ഷേത്രത്തില്‍ വെച്ചുനടന്നു. ചിത്രത്തിന്റെ അണിയറ പ്രവര്‍ത്തകരും താരങ്ങളും പൂജാ ചടങ്ങില്‍ പങ്കെടുത്തിരുന്നു.
രാജേഷ് മാധവന്‍, സിജു സണ്ണി, സുരേഷ് കൃഷ്ണ, ബാബു ആന്റണി എന്നിവരാണ് ചിത്രത്തില്‍ മറ്റു പ്രധാനവേഷങ്ങളില്‍ എത്തുന്നത്. സംവിധായകന്‍ ശിവപ്രസാദും സിജു സണ്ണിയും ചേര്‍ന്നാണ് തിരക്കഥ ഒരുക്കിയിരിക്കുന്നത്.
‘അന്വേഷിപ്പിന്‍ കണ്ടെത്തുവിന്‍’, ‘നടികര്‍’, എന്നിവയാണ് ഈ വര്‍ഷം തിയേറ്ററുകളിലെത്തിയ ടൊവിനോ ചിത്രങ്ങള്‍. പൃഥ്വിരാജ് ബേസില്‍ ജോസഫ് കോമഡി ഫാമിലി ചിത്രമായ ‘ഗുരുവായൂരമ്പല നടയിലാണ് ബേസിലിന്റെ ഒടുവില്‍ തിയേറ്ററില്‍ റിലീസായ ചിത്രം. ആഗോളതലത്തില്‍ ചിത്രം 75 കോടി രൂപയിലധികം നേടിയിട്ടുണ്ടെന്നാണ് റിപ്പോര്‍ട്ടുകള്‍.
Discussion about this post