തങ്ങളുടെ സിനിമയില്‍ അഭിനയിച്ച അഭിനേതാക്കള്‍ക്കും അണിയറ പ്രവര്‍ത്തകര്‍ക്കും ഇതുവരെ പ്രതിഫലം നല്‍കാത്ത സംഭവത്തില്‍ നിര്‍മ്മാണ, വിതരണ കമ്പനിയായ പൂജ എന്റര്‍ടെയ്‌മെന്റ് പ്രതികരിച്ചിരിക്കുകയാണ്. . ഇപ്പോഴത്തെ നിര്‍മ്മാണ കമ്പനിയുടെ പ്രതിസന്ധി സാഹചര്യം പരിഹരിക്കാന്‍ വേണ്ടി ബോളിവുഡ് താരം അക്ഷയ് കുമാര്‍ രംഗത്തെത്തിയതായി വിവരം.
പൂജാ എന്റര്‍ടെയ്‌മെന്റ് നിര്‍മ്മിച്ച സിനിമകളില്‍ പ്രവര്‍ത്തിച്ചവര്‍ക്ക് ഇതുവരെ പ്രതിഫലം ലഭിച്ചില്ലെന്ന് വ്യാപക പരാതി ഉയര്‍ന്നിരുന്നു. ഇത് സംബന്ധിച്ച് വാര്‍ത്തകളും വന്നിരുന്നു. ഏകദേശം രണ്ടാഴ്ച മുമ്പ്, കമ്പനി സ്ഥാപകന്‍ വാഷു ഭഗ്നാനി ശമ്പളം നല്‍കിയില്ലെന്ന് ആരോപിച്ച് വിവിധ ചിത്രങ്ങളുടെ ക്രൂ അംഗങ്ങള്‍ രംഗത്തെത്തിയിരുന്നു.
അക്ഷയ് കുമാറും ടൈഗര്‍ ഷ്റോഫും പ്രധാന വേഷങ്ങളില്‍ അഭിനയിച്ച പൂജാ എന്റര്‍ടെയ്‌മെന്റ് നിര്‍മ്മിച്ച ബഡേ മിയാന്‍ ഛോട്ടേ മിയാന്‍ ബോക്‌സോഫീസിലെ ഈ വര്‍ഷത്തെ ഏറ്റവും വലിയ ദുരന്തങ്ങളില്‍ ഒന്നായിരുന്നു. ഈ ചിത്രത്തിന്റെ സഹനിര്‍മ്മാതാവും വാഷുവിന്റെ മകനും നടനും നിര്‍മ്മാതാവുമായ ജാക്കി ഭഗ്നാനി ഇപ്പോള്‍ ഈ വിഷയത്തില്‍ പ്രതികരിച്ചിരിക്കുകയാണ്.
”അക്ഷയ് സാര്‍ ഈ വിഷയം ചര്‍ച്ച ചെയ്യാന്‍ അടുത്തിടെ എന്നെ കണ്ടിരുന്നു. ക്രൂവിന് പിന്തുണ നല്‍കാനും അദ്ദേഹം മടിച്ചില്ല. ഞങ്ങളുടെ പ്രോജക്റ്റുകളില്‍ പ്രവര്‍ത്തിക്കുന്ന ഓരോ ക്രൂ അംഗത്തിനും അവരുടെ പ്രതിഫലം പൂര്‍ണ്ണമായി കിട്ടിയിട്ടെ തന്റെ പ്രതിഫലം നല്‍കേണ്ടതുള്ളൂ എന്നാണ് അദ്ദേഹം പറഞ്ഞത്.
അക്ഷയ് സാറിന്റെ ഈ തീരുമാനവും ഈ സമയത്ത് ഞങ്ങളോടൊപ്പം നില്‍ക്കാനുള്ള അദ്ദേഹത്തിന്റെ സന്നദ്ധതയ്ക്കും ഞങ്ങള്‍ നന്ദിയുള്ളവരാണ്. സിനിമാ ബിസിനസ്സ് ശക്തമായ ബന്ധങ്ങളെ ആശ്രയിച്ചിരിക്കുന്നു, അതാണ് വ്യവസായത്തില്‍ വളര്‍ത്താന്‍ ഞങ്ങള്‍ ശ്രമിക്കുന്നത്, ‘ ജാക്കി ഭഗ്നാനി പ്രസ്താവനയില്‍ പറഞ്ഞു.
പൂജ എന്റര്‍ടെയ്‌മെന്റിന്റെ അവസാനത്തെ നാല് ചിത്രങ്ങളില്‍ അക്ഷയ് കുമാര്‍ അഭിനയിച്ചിരുന്നു. വന്‍ പരാജയങ്ങളായിരുന്നു ഈ ചിത്രങ്ങള്‍. ബഡേ മിയാന്‍ ഛോട്ടേ മിയാന്‍ അഭിനേതാക്കളായ ടൈഗര്‍ ഷ്രോഫ്, സോനാക്ഷി സിന്‍ഹ, അലയ എഫ്, മാനുഷി ചില്ലര്‍ എന്നിവരും ഏപ്രിലില്‍ റിലീസ് ചെയ്ത ചിത്രത്തിനായുള്ള പ്രതിഫലത്തിനായി കാത്തിരിക്കുകയാണ് .
Discussion about this post