കല്‍ക്കി 2898 എഡിയുടെ ട്രെയിലര്‍ റിലീസ് ചെയ്തതിന് പിന്നാലെ ചിത്രത്തിന്റെ അണിയറക്കാര്‍ തങ്ങളുടെ കലാസൃഷ്ടികള്‍ കോപ്പിയടിച്ചതായി ആരോപണമുന്നയിച്ച് സുങ് ചോയി എന്ന ആര്‍ട്ടിസ്റ്റ് രംഗത്ത് എത്തിയിരുന്നു. ഇപ്പോഴിതാ ഇതിന് പിന്നാലെ ഹോളിവുഡ് കണ്‍സെപ്റ്റ് ആര്‍ട്ടിസ്റ്റായ ഒലിവര്‍ ബെക്കും ഇത്തരത്തിലുള്ള ഒരു ആരോപണവുമായി രംഗത്ത് എത്തിയിരിക്കുകയാണ്.
ഇന്ത്യന്‍ എക്സ്പ്രസുമായുള്ള അഭിമുഖത്തില്‍, കല്‍ക്കി 2898 എഡിയുടെ നിര്‍മ്മാതാക്കള്‍ ഈ ചിത്രത്തില്‍ സഹകരിക്കാന്‍ തന്നെ ആദ്യം സമീപിച്ചിരുന്നുവെന്ന് ഒലിവര്‍ വെളിപ്പെടുത്തി. എന്നാല്‍ ചര്‍ച്ചകള്‍ പരാജയപ്പെട്ടതിനെത്തുടര്‍ന്ന് ഇത് ഉപേക്ഷിച്ചു. പിന്നാലെയാണ് ജൂണ്‍ 10 ന് പുറത്തിറങ്ങിയ ട്രെയിലറില്‍ തന്റെ ചില വര്‍ക്കുകളോട് സാമ്യമുള്ള ചിലത് കണ്ടത്. ഒലിവര്‍ ബെക്ക് ട്രെയിലറില്‍ നിന്നുള്ള ഫ്രെയിമുകളുമായി തന്റെ യഥാര്‍ത്ഥ ചിത്രം വച്ച് എക്‌സില്‍ പോസ്റ്റ് ചെയ്തിരിക്കുകയാണ് ‘കല്‍ക്കി 2898 AD ട്രെയിലറില്‍ തന്റെ സൃഷ്ടി മോഷ്ടിക്കപ്പെട്ടതിനെക്കുറിച്ച് സംഗ് ചോയി എഴുതിയിരുന്നു, തുടര്‍ന്നാണ് ഞാന്‍ ട്രെയിലര്‍ കണ്ടത്. അത് എന്റെ ചില വര്‍ക്കുകളില്‍ നിന്നും ചിലത് എടുത്തതായി കണ്ടു’ -ഒലിവര്‍ പറയുന്നു.
തുടര്‍ന്ന് അത് എന്താണെന്ന് ഒലിവര്‍ വിശദീകരിച്ചു, ‘നിങ്ങള്‍ ഒരു കലാകാരനല്ലെങ്കില്‍ ഒരു കോപ്പിയടി കണ്ടാല്‍ വിഷമം തോന്നില്ല.ചിലപ്പോള്‍ അത് നിങ്ങള്‍ക്ക് മനസിലാകില്ല, പക്ഷേ ഞാന്‍ ബന്ധപ്പെടുന്ന കലാകാരന്മാര്‍ക്കും കലാ സമൂഹത്തിനും ഇത് എന്റെ വര്‍ക്കില്‍ നിന്നും എടുത്തതാണെന്ന് വ്യക്തമാകും. അതേ പടി കോപ്പിയടിയല്ല. എന്നാല്‍ അതിന്റെ രൂപം അത് തന്നെയാണ്. ഇവര്‍ക്ക് എന്നെ അറിയാം. അതിനാല്‍ ഇത് യാദൃശ്ചികമല്ല’.
നിര്‍മ്മാതാക്കള്‍ക്കെതിരെ എന്തെങ്കിലും നിയമനടപടി സ്വീകരിക്കുമോ എന്ന് ചോദിച്ചപ്പോള്‍, അത് ബുദ്ധിമുട്ടാണ് എന്നാണ് പറഞ്ഞത്. ‘എന്റെ കലാസൃഷ്ടി നേരിട്ട് പകര്‍ത്താത്തതിനാല്‍ നിയമപരമായ നടപടി എനിക്ക് വെല്ലുവിളിയാണ്. നിയമനടപടിക്ക് സാധാരണയായി വളരെ വ്യക്തമായ കോപ്പിയടി ആവശ്യമാണ്, ഉദാഹരണത്തിന്, സുങ് ചോയിയുടെ കാര്യത്തില്‍, സൃഷ്ടി നേരിട്ട് കോപ്പി-പേസ്റ്റ് ചെയ്യപ്പെടുകയാണ് ഉണ്ടായത്’ – ഒലിവര്‍ വ്യക്തമാക്കി.
കല്‍ക്കി 2898 എഡിയില്‍ പ്രഭാസ്, അമിതാഭ് ബച്ചന്‍, ദീപിക പദുക്കോണ്‍, കമല്‍ ഹാസന്‍, ദിഷാ പടാനി എന്നിവര്‍ പ്രധാന വേഷങ്ങളില്‍ അഭിനയിക്കുന്നു. ഇത് ഒരു ഡിസ്റ്റോപ്പിയന്‍ കഥയാണ് ചിത്രം പറയുന്നത്. പോസ്റ്റ്-അപ്പോക്കലിപ്റ്റിക് യുഗവും ഹിന്ദു മിത്തോളജിയും ചേരുന്ന ചിത്രം നാഗ് അശ്വിന്‍ ആണ് ചിത്രം സംവിധാനം ചെയ്യുന്നത്. ജൂണ്‍ 27നാണ് ചിത്രം റിലീസാകുന്നത്.
Discussion about this post