ഉര്‍വശിയും പാര്‍വതി തിരുവോത്തും പ്രധാന കഥാപാത്രങ്ങളെ അവതരിപ്പിച്ച ചിത്രമാണ് ഉള്ളൊഴുക്ക്. ക്രിസ്റ്റോ ടോമി സംവിധാനം ചെയ്യുന്ന ചിത്രം മികച്ച അഭിപ്രായമാണ് നേടുന്നത്. ഇപ്പോള്‍ ചിത്രത്തിലെ ഉര്‍വശിയുടെ പ്രകടനത്തെ പുകഴ്ത്തിക്കൊണ്ട് രംഗത്തെത്തിയിരിക്കുകയാണ് സംവിധായകന്‍ എം പത്മകുമാര്‍. പ്രത്യക്ഷപ്പെടുന്ന ഓരോ ഫ്രെയിമിലും ഉര്‍വശിയുടെ ലീലാമ്മയെ അല്ലാതെ മറ്റൊരാളിലേക്കും നമ്മുടെ കാഴ്ചയോ ശ്രദ്ധയോ മാറിപ്പോകുന്നില്ല എന്നാണ് പത്മകുമാര്‍ കുറിക്കുന്നത്. ‘ഉള്ളൊഴുക്ക്’ എന്ന സിനിമയെ പറ്റി പറയുമ്പോള്‍ ക്രിസ്റ്റോ ടോമിയെയും പാര്‍വ്വതി തിരുവോത്തിനെയും പ്രശാന്ത് മുരളിയെയും കുറിച്ച് പറയാതിരിക്കാനാവില്ല. പക്ഷെ സിനിമ കണ്ടിറങ്ങുമ്പോള്‍ എല്ലാ പേരിനും മീതെ ഒരു മഹാമേരു പോലെയാണ് ഉര്‍വ്വശിയെന്നും അദ്ദേഹം കുറിച്ചു.
എം പത്മകുമാറിന്റെ കുറിപ്പ് വായിക്കാം
ഉര്‍വ്വശി എന്ന അഭിനേത്രിയെ ഞാനാദ്യം കാണുന്നത് ‘ഇന്‍സ്‌പെക്ടര്‍ ബല്‍റാം’സിനിമയുടെ സെറ്റിലാണ്. ഞാന്‍ ആ സിനിമയില്‍ ഐ.വി.ശശി എന്ന Legend സംവിധായകന്റെ സഹായിയായി ജോലി ചെയ്യുകയായിരുന്നു.ഉര്‍വ്വശി ശശിയേട്ടന്റെ ‘പൊടി’യായിരുന്നു. പൊടിമോളെന്നാണ് ഉര്‍വ്വശിയെ വീട്ടില്‍ വിളിക്കുക. അന്ന് മലയാളത്തിലും തമിഴിലും തിരക്കുള്ള താരമായിരുന്നെങ്കിലും താരജാഡ ഒട്ടുമില്ലാതെ,ഏറ്റവും താഴെയുള്ള അസിസ്റ്റന്റായ എന്നോടു വരെ കലഹിച്ചും കുസൃതി കാണിച്ചും സെറ്റില്‍ ഓടി നടന്ന ഉര്‍വ്വശിയാണ് അന്നും ഇന്നും എന്റെ മനസ്സില്‍.പിന്നെയും ശശിയേട്ടന്റെ തന്നെ പല സിനിമകളില്‍ ഞങ്ങള്‍ ഒന്നിച്ചുണ്ടായി.പിന്നെ ഉര്‍വ്വശി നിര്‍മ്മാതാവായി, മനോജ്.കെ.ജയന്റെ ഭാര്യയായി, പിന്നീട് എപ്പോഴോ അവര്‍ പിരിഞ്ഞു, കുറച്ചുകാലം സിനിമ ഉര്‍വ്വശിയില്‍ നിന്നും ഉര്‍വ്വശി സിനിമയില്‍ നിന്നും വേറിട്ടു നിന്നു. ഒരു ഇടവേളക്കു ശേഷം സിനിമയിലേക്കു മടങ്ങി വന്ന ഉര്‍വ്വശിക്ക് മറ്റൊരു രൂപവും ഭാവവും ദൗത്യവും ഉണ്ടായിരുന്നു. കഥാപാത്രങ്ങളില്‍ നിന്നും കഥാപാത്രങ്ങളിലേക്കുള്ള ആ കൂടുമാറ്റങ്ങളില്‍ ഏറ്റവും ഒടുവിലത്തേതായി പ്രേക്ഷകര്‍ കണ്ടത് ‘ഉള്ളൊഴുക്കി’ലെ ലീലാമ്മയെയായിരുന്നു. ഒരു അഭിനേത്രി തന്റെ കഥാപാത്രത്തിലൂടെ ഒരു സിനിമയെ സ്വന്തം ചുമലിലേറ്റി എങ്ങനെ മുന്നോട്ടു കൊണ്ടു പോകുകയും പ്രേക്ഷകരെ കൂടെക്കൂട്ടുകയും ചെയ്യുന്നു എന്നതിന്റെ ഉപമകളില്ലാത്ത ദൃഷ്ടാന്തമാണ് ലീലാമ്മയും ഉര്‍വ്വശിയും. ലീലാമ്മ പ്രത്യക്ഷപ്പെടുന്ന ഓരോ ഫ്രെയിമിലും ലീലാമ്മയെ അല്ലാതെ മറ്റൊരാളിലേക്കും നമ്മുടെ കാഴ്ചയോ ശ്രദ്ധയോ മാറിപ്പോകുന്നില്ല എന്നു പറയുമ്പോള്‍ ഒരു അഭിനേത്രിക്ക് തന്റെ കഥാപാത്രത്തിനായി അതില്‍ കൂടുതലായി എന്താണു നല്‍കാനുണ്ടാവുക!
‘ഉള്ളൊഴുക്ക്’ എന്ന സിനിമയെ പറ്റി പറയുമ്പോള്‍ ക്രിസ്റ്റോ ടോമിയെയും പാര്‍വ്വതി തിരുവോത്തിനെയും പ്രശാന്ത് മുരളിയെയും കുറിച്ച് പറയാതിരിക്കാനാവില്ല. പക്ഷെ സിനിമ കണ്ടിറങ്ങുമ്പോള്‍ എല്ലാ പേരിനും മീതെ ഒരു മഹാമേരു പോലെ ഉര്‍വ്വശി എന്ന ശശിയേട്ടന്റെ പഴയ പൊടിമോള്‍ ഉയര്‍ന്നു തന്നെ നില്‍ക്കുന്നു.
Discussion about this post